Team India
ಶ್ರೀಲಂಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಯುವ ನಾಯಕ ಶುಭಮನ್ ಗಿಲ್ ನೇತೃತ್ವದ ಟೀಮ್ ಇಂಡಿಯಾ ಭರ್ಜರಿ ಜಯ ಸಾಧಿಸಿ ಸರಣಿಯಲ್ಲಿ ಶುಭಾರಂಭ ಮಾಡಿದೆ. ಆದರೆ, ಈ ಒಂದು ಗೆಲುವಿನೊಂದಿಗೆ ಟೀಮ್ ಇಂಡಿಯಾ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ (WTC) ಫೈನಲ್ ಹಾದಿ ಸುಗಮವಾಗುವುದಿಲ್ಲ. ಬದಲಾಗಿ ಮುಂದಿನ ಎಲ್ಲಾ ಪಂದ್ಯಗಳಲ್ಲೂ ಟೀಮ್ ಇಂಡಿಯಾ ಭರ್ಜರಿ ಪ್ರದರ್ಶನ ನೀಡಬೇಕಾದ ಅನಿವಾರ್ಯತೆ ಎದುರಾಗಿದೆ.
ಅಂದರೆ, ಯಾವುದೇ ಇತರ ತಂಡಗಳ ಫಲಿತಾಂಶದ ಮೇಲೆ ಅವಲಂಬಿತವಾಗದೆ, ನೇರವಾಗಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ಗೇರಲು ಭಾರತ ತಂಡದ ಮುಂದೆ 7-1 ಲೆಕ್ಕಾಚಾರವಿದೆ.
7 ಗೆಲುವಿನ ಅನಿವಾರ್ಯತೆ!
ಪ್ರಸ್ತುತ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಸರಣಿಯಲ್ಲಿ ಭಾರತ ತಂಡಕ್ಕೆ ಬಾಕಿ ಉಳಿದಿರುವುದು ಕೇವಲ 8 ಪಂದ್ಯಗಳು ಮಾತ್ರ. ಈ ಎಂಟು ಮ್ಯಾಚ್ಗಳ ಪೈಕಿ ಕನಿಷ್ಠ 7 ಪಂದ್ಯಗಳಲ್ಲಿ ಭಾರತ ಕಡ್ಡಾಯವಾಗಿ ಜಯಭೇರಿ ಬಾರಿಸಲೇಬೇಕಿದೆ. ಒಂದು ವೇಳೆ ಈ ಸಾಧನೆ ಮಾಡಿದರೆ, ಭಾರತ ತಂಡವು ಶೇಕಡಾವಾರು ಅಂಕಗಳ ಪಟ್ಟಿಯಲ್ಲಿ 68.52% (PCT) ಗಳಿಸುವ ಮೂಲಕ ನೇರವಾಗಿ ಫೈನಲ್ ಹಂತಕ್ಕೆ ಲಗ್ಗೆ ಇಡಲಿದೆ.
ಟೀಮ್ ಇಂಡಿಯಾ ಮುಂದಿನ ಎದುರಾಳಿಗಳು!
ಟೀಮ್ ಇಂಡಿಯಾದ ಫೈನಲ್ ಹಾದಿಯಲ್ಲಿ ಮುಂದಿನ ಎದುರಾಳಿಗಳು ಸಣ್ಣ ಮಟ್ಟದ ತಂಡಗಳಲ್ಲ. ಶ್ರೀಲಂಕಾ, ನ್ಯೂಝಿಲೆಂಡ್ ಮತ್ತು ಆಸ್ಟ್ರೇಲಿಯಾ ವಿರುದ್ಧ ಭಾರತ ಸೆಣಸಾಡಬೇಕಿದೆ:
-
- ಶ್ರೀಲಂಕಾ ಪ್ರವಾಸ: ಪ್ರಸ್ತುತ ಸರಣಿಯಲ್ಲಿ ಭಾರತ ತಂಡವು ಇನ್ನೊಂದು ಟೆಸ್ಟ್ ಪಂದ್ಯವನ್ನು ಆಡಬೇಕಿದೆ.
- ನ್ಯೂಝಿಲೆಂಡ್ ಸರಣಿ: ಅಕ್ಟೋಬರ್-ನವೆಂಬರ್ ಅವಧಿಯಲ್ಲಿ ಕಿವೀಸ್ ಪಡೆ ಭಾರತ ಪ್ರವಾಸ ಕೈಗೊಳ್ಳಲಿದ್ದು, 2 ಪಂದ್ಯಗಳ ಕಠಿಣ ಟೆಸ್ಟ್ ಸರಣಿ ನಡೆಯಲಿದೆ.
- ಬೋರ್ಡರ್-ಗವಾಸ್ಕರ್ ಟ್ರೋಫಿ: ಇದಾದ ಬಳಿಕ ಕ್ರಿಕೆಟ್ ಲೋಕದ ಹೈ-ವೋಲ್ಟೇಜ್ ಕದನ ಆರಂಭವಾಗಲಿದ್ದು, ತವರಿನಲ್ಲಿ ಆಸ್ಟ್ರೇಲಿಯಾ ವಿರುದ್ಧ 5 ಪಂದ್ಯಗಳ ಬೃಹತ್ ಟೆಸ್ಟ್ ಸರಣಿ ಜರುಗಲಿದೆ.
Smiles all around in Galle! 😊
📽️ Reactions after #TeamIndia took a 1-0 lead after a splendid win in the 1st #SLvIND Test 👌👌 pic.twitter.com/zWfX9WKOAm
— BCCI (@BCCI) August 19, 2026
ಫೈನಲ್ ಹಾದಿ ಹೀಗಿದೆ:
ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ ಹಾದಿಯನ್ನು ಸಂಪೂರ್ಣ ಸುಗಮಗೊಳಿಸಲು ಭಾರತಕ್ಕೆ ಶ್ರೀಲಂಕಾ ವಿರುದ್ಧದ ಎರಡನೇ ಟೆಸ್ಟ್ನಲ್ಲಿ ಜಯ ದಾಖಲಿಸುವುದು ಅತ್ಯಗತ್ಯ. ಇದಾದ ಬಳಿಕ ನ್ಯೂಝಿಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯನ್ನು 2-0 ಅಂತರದಿಂದ ಕ್ಲೀನ್ ಸ್ವೀಪ್ ಮಾಡಬೇಕಿದೆ. ಈ ಸರಣಿಗಳ ಯಶಸ್ಸಿನ ನಂತರ, ಪ್ರಶಸ್ತಿ ರೇಸ್ನಲ್ಲಿ ಮುನ್ನಡೆಯಲು ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ ಕನಿಷ್ಠ 4-1 ಅಥವಾ 4-0 ಅಂತರದ ಐತಿಹಾಸಿಕ ಗೆಲುವು ಸಾಧಿಸಬೇಕಾದ ಸವಾಲು ಭಾರತದ ಮುಂದಿದೆ.
ಇದನ್ನೂ ಓದಿ: ಕ್ರಿಮಿನಲ್ ಕೇಸ್ ‘ಸಿಎಂ’ ಪಟ್ಟಿಯಲ್ಲಿ ಡಿಕೆಶಿಗೆ 3ನೇ ಸ್ಥಾನ!
ಒಂದು ವೇಳೆ ಭಾರತ ತಂಡವು ಒಂದಕ್ಕಿಂತ ಹೆಚ್ಚು ಪಂದ್ಯಗಳಲ್ಲಿ ಸೋಲು ಕಂಡರೆ, ಫೈನಲ್ ಟಿಕೆಟ್ಗಾಗಿ ಇತರ ತಂಡಗಳ ಜಯ-ಸೋಲಿನ ಲೆಕ್ಕಾಚಾರವನ್ನು ಎದುರು ನೋಡಬೇಕಾಗುತ್ತದೆ. ಹೀಗಾಗಿಯೇ ಶುಭಮನ್ ಗಿಲ್ ಸಾರಥ್ಯದ ಭಾರತೀಯ ಯುವ ಪಡೆಗೆ ಮುಂದಿನ ಪ್ರತಿ ಪಂದ್ಯವೂ ‘ಮಾಡು ಇಲ್ಲವೇ ಮಡಿ’ ಎಂಬಂತಾಗಿದ್ದು, ಕ್ರಿಕೆಟ್ ಅಭಿಮಾನಿಗಳಲ್ಲಿ ಭಾರಿ ಕುತೂಹಲ ಮೂಡಿಸಿದೆ.
