“ಕಾರ್ಪೊರೇಟ್ ಜಗತ್ತಿನ ಪ್ರತಿಷ್ಠಿತ ಲೋಗೋಗಳು ಮತ್ತು ಶಿಸ್ತಿನ ಸಮವಸ್ತ್ರಗಳ ಹಿಂದೆ ಅದೆಂತಹ ಕರಾಳ ಮುಖ ಅಡಗಿರಬಹುದು ಎಂಬುದಕ್ಕೆ ನಾಸಿಕ್‌ನ ಟಿಸಿಎಸ್ (TCS) ಪ್ರಕರಣ ಒಂದು ಜ್ವಲಂತ ಉದಾಹರಣೆ. ಅತ್ಯಾಧುನಿಕ ಸೌಲಭ್ಯಗಳಿರುವ ಬಿಪಿಒ ಕಚೇರಿಯೇ ಹೆಣ್ಣುಮಕ್ಕಳಿಗೆ ಅಸುರಕ್ಷಿತ ತಾಣವಾಗಿ ಮಾರ್ಪಟ್ಟಿದ್ದಾಗ, ಅಲ್ಲಿನ ಅನ್ಯಾಯವನ್ನು ಬಯಲಿಗೆಳೆಯಲು ಖಾಕಿ ಪಡೆ ಬಳಸಿದ್ದು ಅಸಾಮಾನ್ಯ ತಂತ್ರ.
ಸಾಮಾನ್ಯ ಉದ್ಯೋಗಿಗಳಂತೆ ವೇಷಧರಿಸಿ, ಕಂಪ್ಯೂಟರ್ ಮುಂದೆ ಕುಳಿತು 40 ದಿನಗಳ ಕಾಲ ಹಗಲಿರುಳು ನಡೆಸಿದ ಆ ‘ಅಂಡರ್ ಕವರ್’ ಕಾರ್ಯಾಚರಣೆ ಕೇವಲ ಅಪರಾಧಿಗಳನ್ನು ಹಿಡಿಯಲಿಕ್ಕಷ್ಟೇ ಅಲ್ಲ, ಕಾರ್ಪೊರೇಟ್ ಗೋಡೆಗಳ ಹಿಂದೆ ಅಡಗಿದ್ದ ವ್ಯವಸ್ಥಿತ ಕಿರುಕುಳದ ಜಾಲವನ್ನು ಧ್ವಂಸಗೊಳಿಸಲು ಸಜ್ಜಾಗಿತ್ತು. ಇದು ಕೇವಲ ಒಂದು ಕ್ರೈಂ ಸ್ಟೋರಿಯಲ್ಲ; ಅಧಿಕಾರ ಮತ್ತು ದುರಹಂಕಾರದ ನಡುವೆ ನಲುಗುತ್ತಿದ್ದ ಹೆಣ್ಣುಮಕ್ಕಳಿಗೆ ನ್ಯಾಯ ಕೊಡಿಸಲು ನಡೆಸಿದ ಸಾಹಸಗಾಥೆ.”
ಪ್ರಕರಣದ ಹಿನ್ನೆಲೆ:
ಈ ಪ್ರಕರಣವು ಬೆಳಕಿಗೆ ಬಂದಿದ್ದು ನಾಸಿಕ್‌ನ ಅಂಬಾಡ್ ಪ್ರದೇಶದಲ್ಲಿರುವ ಟಿಸಿಎಸ್ ಬಿಪಿಒ (BPO) ಘಟಕದಲ್ಲಿ. ಇಲ್ಲಿ ಕೆಲಸ ಮಾಡುತ್ತಿದ್ದ ಕೆಲವು ಮಹಿಳಾ ಉದ್ಯೋಗಿಗಳು ತಮಗೆ ಮೇಲಧಿಕಾರಿಗಳಿಂದ ನಿರಂತರವಾಗಿ ಲೈಂಗಿಕ ಕಿರುಕುಳವಾಗುತ್ತಿದೆ ಎಂದು ನಾಸಿಕ್ ಪೊಲೀಸ್ ಕಮಿಷನರ್ ಸಂದೀಪ್ ಕಾರ್ಣಿಕ್ ಅವರಿಗೆ ರಹಸ್ಯವಾಗಿ ಮಾಹಿತಿ ನೀಡಿದ್ದರು.
ಕಂಪನಿಯ ಒಳಗಿನ ಕೆಲವು ಟೀಮ್ ಲೀಡರ್‌ಗಳು ಮತ್ತು ಮ್ಯಾನೇಜರ್‌ಗಳು ಮಹಿಳಾ ಉದ್ಯೋಗಿಗಳಿಗೆ ಕಿರುಕುಳ ನೀಡುತ್ತಿದ್ದರು ಎಂಬುದು ಪ್ರಾಥಮಿಕ ಆರೋಪ. ಪ್ರಮುಖವಾಗಿ:
- ಕೆಲಸದ ಅವಧಿಯಲ್ಲಿ ಅಸಭ್ಯವಾಗಿ ವರ್ತಿಸುವುದು.
- ಮೀಟಿಂಗ್‌ಗಳ ಹೆಸರಿನಲ್ಲಿ ಮಹಿಳೆಯರನ್ನು ಕರೆದು ಕಿರುಕುಳ ನೀಡುವುದು.
- ಕೆಲಸದ ಒತ್ತಡ ಹೇರಿ ಅಥವಾ ಪ್ರಮೋಷನ್ ಆಮಿಷವೊಡ್ಡಿ ಲೈಂಗಿಕ ಬೇಡಿಕೆ ಇಡುವುದು.
- ಕೆಲವು ಪ್ರಕರಣಗಳಲ್ಲಿ ಬಲವಂತದ ಮತಾಂತರದ ಪ್ರಯತ್ನಗಳು ನಡೆದಿದ್ದವು ಎಂಬ ಗಂಭೀರ ಆರೋಪಗಳೂ ಕೇಳಿಬಂದಿವೆ.
HR ವಿಭಾಗದ ವೈಫಲ್ಯ:
ಈ ಪ್ರಕರಣದಲ್ಲಿ ಅತ್ಯಂತ ಆಘಾತಕಾರಿ ವಿಷಯವೆಂದರೆ, ಮಹಿಳಾ ಉದ್ಯೋಗಿಗಳು ಕಂಪನಿಯ ಆಂತರಿಕ ದೂರು ಸಮಿತಿ ಅಥವಾ ಹೆಚ್.ಆರ್ ಮ್ಯಾನೇಜರ್‌ಗಳಿಗೆ ದೂರು ನೀಡಿದರೂ ಯಾವುದೇ ಕ್ರಮ ಕೈಗೊಂಡಿರಲಿಲ್ಲ. ಬದಲಾಗಿ, ದೂರು ನೀಡಿದ ಮಹಿಳೆಯರನ್ನೇ ಬೆದರಿಸಲಾಗುತ್ತಿತ್ತು ಅಥವಾ ಅವರ ದೂರುಗಳನ್ನು ಮುಚ್ಚಿ ಹಾಕಲಾಗುತ್ತಿತ್ತು ಎಂದು ಹೇಳಲಾಗಿದೆ.
ದೀರ್ಘಕಾಲದ ಕಿರುಕುಳ:
ಪೊಲೀಸ್ ತನಿಖೆಯ ಪ್ರಕಾರ, ಈ ಕಿರುಕುಳವು ಕೇವಲ ಒಂದು ದಿನದ ಘಟನೆಯಲ್ಲ. ಇದು 2022 ರಿಂದ 2026 ರವರೆಗೆ ಸತತವಾಗಿ ನಡೆಯುತ್ತಲೇ ಇತ್ತು. ಅನೇಕ ಮಹಿಳೆಯರು ಕೆಲಸ ಕಳೆದುಕೊಳ್ಳುವ ಭೀತಿಯಿಂದ ಸುಮ್ಮನಿದ್ದರು.
ರಹಸ್ಯ ಪಡೆಯ ಕಾರ್ಯಾಚರಣೆ:
ಅಂಬಾಡ್ನಲ್ಲಿರುವ ಟಿಸಿಎಸ್ ಬಿಪಿಒ (BPO) ಘಟಕದ ಮಹಿಳಾ ಉದ್ಯೋಗಿಗಳಿಗೆ ಲೈಂಗಿಕ ಕಿರುಕುಳ ನೀಡುತ್ತಿರುವ ಬಗ್ಗೆ ಪದೇ ಪದೇ ದೂರು ದಾಖಲಾಗುತ್ತಿದ್ದಂತೆ, ನಾಸಿಕ್ ಪೊಲೀಸ್ ಕಮಿಷನರ್ ಸಂದೀಪ್ ಕಾರ್ಣಿಕ್ ಅವರ ಚೇಂಬರ್‌ನಲ್ಲಿ ಒಂದು ಸಭೆ ನಡೆಯುತ್ತದೆ. ಈ ಸಭೆಯ ಚರ್ಚೆಯ ವೇಳೆ ಆರೋಪಿಗಳು ಪ್ರಭಾವಶಾಲಿಗಳು, ಪುರಾವೆಗಳಿಲ್ಲದೆ ಹಿಡಿಯುವುದು ಅಸಾಧ್ಯ ಎಂಬುದು ಗೊತ್ತಾಗುತ್ತದೆ. ಆಗಲೇ ಸಿದ್ಧವಾಗಿದ್ದೇ ಆರು ಮಂದಿ ಮಹಿಳಾ ಪೊಲೀಸರ ‘ಅಂಡರ್ ಕವರ್ ಟೀಮ್’. ಇವರು ಬಂದೂಕು ಹಿಡಿಯುವ ಬದಲು ಲ್ಯಾಪ್ಟಾಪ್ ಹಿಡಿದು ಆಫೀಸ್ ಒಳಗೆ ಕಾಲಿಡಲು ಸಿದ್ಧರಾಗುತ್ತಾರೆ.
ಪೊಲೀಸ್ ಸಮವಸ್ತ್ರ ಕಳಚಿ, ಮಾಡರ್ನ್ ಡ್ರೆಸ್ ಧರಿಸಿದ ಆ ಆರು ಮಹಿಳಾ ಪೊಲೀಸರು ಟಿಸಿಎಸ್ ಕಚೇರಿಗೆ ಹೊಸ ಉದ್ಯೋಗಿಗಳಂತೆ ಸೇರಿಕೊಳ್ಳುತ್ತಾರೆ. ಸುಮಾರು 40 ದಿನಗಳ ಕಾಲ ಅವರು ಅಲ್ಲಿನ ಉದ್ಯೋಗಿಗಳಂತೆಯೇ ಕೆಲಸ ಮಾಡುತ್ತಾರೆ. ಯಾರೊಬ್ಬರಿಗೂ ಇವರು ಪೊಲೀಸರೆಂಬ ಸಣ್ಣ ಸುಳಿವು ಕೂಡ ಸಿಗದಂತೆ ಅತಿ ಜಾಗರೂಕತೆಯಿಂದ ಇರುತ್ತಾರೆ.
ಕೆಲಸದ ನಡುವೆ ಈ ಮಹಿಳಾ ಪೊಲೀಸರು ಅಲ್ಲಿ ನಡೆಯುತ್ತಿದ್ದ ಅನಾಚಾರಗಳನ್ನು ಕಣ್ಣಾರೆ ಕಾಣುತ್ತಾರೆ. ಸಭೆಗಳ ಹೆಸರಿನಲ್ಲಿ ನಡೆಯುತ್ತಿದ್ದ ಅಸಭ್ಯ ವರ್ತನೆ, ಕಿರುಕುಳ, ಮತ್ತು ಇದನ್ನು ಮುಚ್ಚಿ ಹಾಕುತ್ತಿದ್ದ ಹೆಚ್.ಆರ್ ಅಧಿಕಾರಿಗಳ ಕುತಂತ್ರ ಎಲ್ಲವನ್ನೂ ರಹಸ್ಯ ಕ್ಯಾಮೆರಾಗಳಲ್ಲಿ ಸೆರೆಹಿಡಿಯುತ್ತಾರೆ. ಸುಮಾರು 40ಕ್ಕೂ ಹೆಚ್ಚು ಸಿಸಿಟಿವಿ ಕ್ಲಿಪ್‌ಗಳು ಸತ್ಯವನ್ನು ಬಚ್ಚಿಟ್ಟಿದ್ದವು.
ದಿ ಕ್ಲೈಮ್ಯಾಕ್ಸ್ – ಮಿಡ್‌ನೈಟ್ ರೈಡ್!
ಎಲ್ಲಾ ಪುರಾವೆಗಳು ಕೈಸೇರಿದ ನಂತರ, ಸಿನೆಮಾ ಸ್ಟೈಲ್‌ನಲ್ಲಿ ಪೊಲೀಸರು ಆಫೀಸ್ ಮೇಲೆ ದಾಳಿ ಮಾಡುತ್ತಾರೆ. ಅಲ್ಲಿಯವರೆಗೆ ಜೊತೆಯಲ್ಲಿ ಕೆಲಸ ಮಾಡಿದ್ದವರು ಪೊಲೀಸರೆಂದು ತಿಳಿದಾಗ ಆರೋಪಿಗಳ ಮುಖ ಬೆಳ್ಳಗಾಗುತ್ತದೆ. ಡ್ಯಾನಿಶ್ ಶೇಖ್, ತೌಸಿಫ್ ಅತ್ತಾರ್ ಸೇರಿದಂತೆ 7 ಮಂದಿ ಕಾಮುಕರನ್ನು ಮತ್ತು ಕಿರುಕುಳಕ್ಕೆ ಸಾಥ್ ನೀಡಿದ ಹೆಚ್.ಆರ್ ಮ್ಯಾನೇಜರ್ ನಿದಾ ಖಾನ್‌ಳನ್ನು ಪೊಲೀಸರು ಜೈಲಿಗಟ್ಟಿದ್ದಾರೆ.
ಇದನ್ನೂ ಓದಿ: ಮಾವಿನ ಹಣ್ಣು ತಿಂದ ತಕ್ಷಣ ನೀರು ಏಕೆ ಕುಡಿಯಬಾರದು ಗೊತ್ತಾ?
ಒಟ್ಟಿನಲ್ಲಿ “ವೃತ್ತಿ ಬದುಕಿನ ಹೆಸರಲ್ಲಿ ನಡೆಯುತ್ತಿದ್ದ ಈ ಅಸಹ್ಯಕರ ಕೃತ್ಯಕ್ಕೆ ಈಗ ಪೋಲಿಸ್ ಇಲಾಖೆ ಫುಲ್ ಸ್ಟಾಪ್ ಇಟ್ಟಿದೆ. ಕಾನೂನಿನ ಕಣ್ಣಿನಿಂದ ಯಾರೂ ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲ ಎಂಬುದು ಈ ಬಂಧನದ ಮೂಲಕ ಸಾಬೀತಾಗಿದೆ. ಆರೋಪಿಗಳು ಈಗ ಕಂಬಿ ಎಣಿಸುತ್ತಿದ್ದು, ಸಂತ್ರಸ್ತರಿಗೆ ನ್ಯಾಯ ಸಿಗುವ ಭರವಸೆ ಮೂಡಿದೆ.”
