Vishu Poster
ತಿರುವನಂತಪುರಂ: ಕೇರಳದಲ್ಲಿ ವಿಷು ಹಬ್ಬದ ಶುಭಾಶಯ ಕೋರುವ ಭರದಲ್ಲಿ ಶ್ರೀಕೃಷ್ಣನ ಚಿತ್ರದೊಂದಿಗೆ ಮಾಂಸಾಹಾರದ ಫೋಟೋ ಬಳಸಿದ ರೆಸ್ಟೋರೆಂಟ್ ಮಾಲೀಕನ ವಿರುದ್ಧ ಪೊಲೀಸರು ಕ್ರಮ ಕೈಗೊಂಡಿದ್ದಾರೆ. ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತಂದ ಆರೋಪದ ಮೇಲೆ ಆಲಪ್ಪುಳ ಜಿಲ್ಲೆಯ ಚೇರ್ತಲ ಮೂಲದ ರೆಸ್ಟೋರೆಂಟ್ ಮಾಲೀಕ ಅರ್ಷದ್ ಎಂಬುವವರನ್ನು ಬಂಧಿಸಲಾಗಿದೆ.
ಘಟನೆಯ ಹಿನ್ನೆಲೆ:
ಕೇರಳದ ಸುಗ್ಗಿಯ ಹಬ್ಬವಾದ ‘ವಿಷು’ ಸಂದರ್ಭದಲ್ಲಿ ಕೇರಳದಾದ್ಯಂತ ಕೃಷ್ಣನ ವಿಗ್ರಹದ ಮುಂದೆ ಹಣ್ಣು, ತರಕಾರಿ ಹಾಗೂ ಧಾನ್ಯಗಳನ್ನು ಇಟ್ಟು ‘ವಿಷು ಕಣಿ’ ನೋಡುವುದು ಸಂಪ್ರದಾಯ.
ಆದರೆ, ಚೇರ್ತಲದಲ್ಲಿರುವ ‘ಮೆಹರ್ ಮಂಡಿ ಆಂಡ್ ಗ್ರಿಲ್ಸ್’ ಎಂಬ ರೆಸ್ಟೋರೆಂಟ್ ತನ್ನ ಪ್ರಚಾರಕ್ಕಾಗಿ ವಿಶಿಷ್ಟ ಪೋಸ್ಟರ್ ಒಂದನ್ನು ಸಿದ್ಧಪಡಿಸಿತ್ತು. ಈ ಪೋಸ್ಟರ್ನಲ್ಲಿ ಬಾಲಕೃಷ್ಣನ ವಿಗ್ರಹದ ಮುಂದೆ ಹಣ್ಣು-ಹಂಪಲುಗಳ ಬದಲಿಗೆ ‘ಚಿಕನ್ ಮಂದಿ’ (ಮಾಂಸಾಹಾರದ ಖಾದ್ಯ) ಇರುವುದನ್ನು ತೋರಿಸಲಾಗಿತ್ತು.
ಸಾಮಾಜಿಕ ಜಾಲತಾಣದಲ್ಲಿ ಆಕ್ರೋಶ:
ಈ ಪೋಸ್ಟರ್ ವಾಟ್ಸಾಪ್ ಮತ್ತು ಫೇಸ್ಬುಕ್ನಲ್ಲಿ ವೈರಲ್ ಆಗುತ್ತಿದ್ದಂತೆ ಹಿಂದೂ ಸಂಘಟನೆಗಳು ಮತ್ತು ಭಕ್ತರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು. ದೇವರಿಗೆ ಮಾಂಸಾಹಾರವನ್ನು ನೈವೇದ್ಯವಾಗಿ ತೋರಿಸುವುದು ಉದ್ದೇಶಪೂರ್ವಕವಾಗಿ ಮಾಡಿದ ಅವಮಾನ ಎಂದು ಅನೇಕರು ದೂರಿದರು.
ಪೊಲೀಸ್ ಕ್ರಮ:
ವಿವಾದ ತಾರಕಕ್ಕೇರುತ್ತಿದ್ದಂತೆ ಎಚ್ಚೆತ್ತ ಪೊಲೀಸರು, ಭಾರತೀಯ ನ್ಯಾಯ ಸಂಹಿತೆಯ (BNS) ಸೆಕ್ಷನ್ 192 ರ ಅಡಿಯಲ್ಲಿ (ಕೋಮು ಸೌಹಾರ್ದಕ್ಕೆ ಧಕ್ಕೆ ಮತ್ತು ಗಲಭೆಗೆ ಪ್ರಚೋದನೆ) ಪ್ರಕರಣ ದಾಖಲಿಸಿಕೊಂಡರು. ತನಿಖೆಯ ನಂತರ ರೆಸ್ಟೋರೆಂಟ್ ಮಾಲೀಕ ಅರ್ಷದ್ ಮತ್ತು ಪೋಸ್ಟರ್ ತಯಾರಿಕೆಗೆ ಸಹಕರಿಸಿದ ಮತ್ತೊಬ್ಬ ವ್ಯಕ್ತಿಯನ್ನು ಬಂಧಿಸಲಾಗಿದೆ.
ಇದನ್ನೂ ಓದಿ: ಆಹಾರ ವಾಹಿನಿ ಯೋಜನೆ: ಸರ್ಕಾರಿದಂದ ಸಿಗುತ್ತೆ 3 ಲಕ್ಷ ರೂ!
ರೆಸ್ಟೋರೆಂಟ್ ಸ್ಪಷ್ಟನೆ:
ಈ ನಡುವೆ, ವಿವಾದದ ತೀವ್ರತೆ ಅರಿತ ರೆಸ್ಟೋರೆಂಟ್ ಆಡಳಿತ ಮಂಡಳಿಯು ಸಾರ್ವಜನಿಕವಾಗಿ ಕ್ಷಮೆಯಾಚಿಸಿದೆ. “ಇದು ನಮ್ಮ ಗ್ರಾಫಿಕ್ ಡಿಸೈನರ್ ಮಾಡಿದ ತಪ್ಪು. ಉದ್ದೇಶಪೂರ್ವಕವಾಗಿ ಯಾರ ಮನಸ್ಸಿಗೂ ನೋವು ಮಾಡುವ ಉದ್ದೇಶ ನಮಗಿರಲಿಲ್ಲ” ಎಂದು ಮಾಲೀಕರು ಕ್ಷಮಾಪಣೆ ಕೋರಿದ್ದಾರೆ. ಸದ್ಯ ಮುನ್ನೆಚ್ಚರಿಕಾ ಕ್ರಮವಾಗಿ ರೆಸ್ಟೋರೆಂಟ್ ಬಳಿ ಬಿಗಿ ಪೊಲೀಸ್ ಬಂದೋಬಸ್ತ್ ಏರ್ಪಡಿಸಲಾಗಿದೆ.
